ସାଧାରଣତନ୍ତ୍ର ଦିବସ ଅବସରରେ ତୁମୁରିପାଣି ଗ୍ରାମବାସୀଙ୍କ ଛାତ୍ରଛାତ୍ରୀଙ୍କ ପ୍ରତି ଅନବିଲ ସ୍ନେହ ପ୍ରଦର୍ଶନ

ସାଧାରଣତନ୍ତ୍ର ଦିବସ ଉପଲକ୍ଷେ ସମସ୍ତଙ୍କୁ ହାର୍ଦିକ ଶୁଭେଚ୍ଛା ଓ ଶୁଭକାମନା.

ପୋଷ୍ଟ କରିବା ଉଦ୍ଦେଶ୍ୟ ହେଲା ଯେ ବରଗଡ଼ ଜିଲ୍ଲା ଝାରବନ୍ଧ ବ୍ଲକ ତୁମୁରିପାଣି ଗାଁର ଲୋକେ ସାଧାରଣତନ୍ତ୍ର ଦିବସ 

ଏବଂ ସ୍ୱାଧୀନତା ଦିବସ ଉପଲକ୍ଷେ ଛାତ୍ରଛାତ୍ରୀ ଙ୍କ ଗ୍ରାମ ପରିଭ୍ରମଣ ସମୟରେ 

 ପିଲାଙ୍କୁ ଉତ୍ସାହିତ କରିବା ନିମନ୍ତେ ପ୍ରତ୍ୟେକ ବର୍ଷ ଅନେକ ଲୋକେ ପିଲାଙ୍କୁ କିଛି ଶୁଖିଲା ଖାଦ୍ୟ

 ଉପହାର ଦେଇଥାନ୍ତି ଯାହାକି ମୋତେ ବିଶେଷ ଭାବରେ ପ୍ରଭାବିତ କରେ .

ବାସ୍ତବିକ ଏହା ଗ୍ରାମବାସୀଙ୍କ ସ୍କୁଲ ଛାତ୍ରଛାତ୍ରୀଙ୍କ ପ୍ରତି ଅନାବିଲ ସ୍ନେହକୁ ଦର୍ଶାଉଛି.ତେଣୁ ସମସ୍ତ ଗ୍ରାମବାସୀଙ୍କୁ ମୋର ଅଶେଷ ଧନ୍ୟବାଦ..

ବିଦ୍ୟାଳୟରେ"ମୋ ସରକାର" ଢାଞ୍ଚାରେ ମତାମତ ସଂଗ୍ରହ ବ୍ୟବସ୍ଥା

ବର୍ତ୍ତମାନ ରାଜ୍ୟରେ "ମୋ ସରକାର" ଭଳିଆ ଏକ ଅତ୍ୟନ୍ତ ଜନାହିତକାରୀ ପଦକ୍ଷେପ ଦ୍ୱାରା ସରକାର, ପ୍ରଶାସନ ତଥା ଲୋକମାନଙ୍କ  ମଧ୍ୟରେ ଦୂରତ୍ୱ କମିବାରେ ଲାଗିଛି. ରାଜ୍ୟରେ "5T" କାର୍ଯ୍ୟକାରୀ ହେବା ଦ୍ୱାରା ବର୍ତ୍ତମାନ ଲୋକେ ସହଜେ  ସୁବିଧା ସୁଯୋଗ ପାଉଛନ୍ତି.

       ବିଦ୍ୟାଳୟରେ ଛାତ୍ରଛାତ୍ରୀ,ଅଭିଭାବକ ଏବଂ ଶିକ୍ଷକଙ୍କ ମଧ୍ୟରେ ନିତାନ୍ତ ଆବଶ୍ୟକ ହେଉଥିବା ତାଳମେଳକୁ ଆଖିଆଗରେ ରଖି ଯୁକ୍ତାତ୍ମକ ଚିନ୍ତାଧାରା ରଖି ଆମ ବିଦ୍ୟାଳୟରେ "ମୋ ସରକାର" ଢାଞ୍ଚାରେ ଏକ ଉଦ୍ୟମ କରାଯାଇଛି ଯାହା ସୁଫଳ ହେଲେ ସମସ୍ତଙ୍କ ପାଇଁ ତଥା ସରକାରୀ ସ୍କୁଲରେ ପାଠ ପଢ଼ୁଥିବା ପିଲାଙ୍କ ପାଇଁ ବିଶେଷ ଉପଯୋଗୀ ହୋଇପାରିବ ବୋଲି ମୋର ଆଶା ଆଉ ଭରଷା.

 ଶିକ୍ଷାର୍ଥୀ ମାନେ ଘରକୁ ଗଲାପରେ କିଭଳି ଭାବେ ଏକ ଶୃଙ୍ଖଳିତ ଜୀବନ ଯାପନ କରିବା ସଙ୍ଗେ ସଙ୍ଗେ ନିର୍ଦ୍ଧାରିତ ସମୟରେ ପାଠପଢ଼ା ରୁ ଆରମ୍ଭ କରି ସକାଳୁ ଉଠିବା ରୁ ନେଇ ରାତିରେ ଶୋଇବା ପର୍ୟ୍ଯନ୍ତ ଏକ ଶୃଙ୍ଖଳା ଚାର୍ଟ ସମସ୍ତ ଙ୍କୁ ପ୍ରଦାନ କରାଯାଇଛି ଯେଉଁଥିରେ ଶ୍ରେଣୀ ଶିକ୍ଷକ ଏବଂ ପ୍ରଧାନ ଶିକ୍ଷକ ଙ୍କ ଯୋଗାଯୋଗ ନମ୍ବର ଉଲ୍ଲେଖ ଅଛି .ଏହି ଶୃଙ୍ଖଳା ଚାର୍ଟ କାନ୍ଥ ଘଣ୍ଟା ପାଖାପାଖି ରହିବ ,ଏହି ନମ୍ବର ଦ୍ୱାରା ଅଭିଭାବକ ମାନେ ଶିକ୍ଷକ ଶିକ୍ଷୟିତ୍ରୀ ଙ୍କୁ ଯୋଗାଯୋଗ କରି ତାଙ୍କର ମତାମତ, ଅଭିଯୋଗ କରିପାରିବେ. ଅପର ପକ୍ଷରେ ସମସ୍ତ ଅଭିଭାବକ ଙ୍କ ଯୋଗାଯୋଗ ନମ୍ବର ଶିକ୍ଷକଙ୍କ ପାଖରେ ରହିବ ଯେଉଁଥିରେ ପିଲାମାନେ ନିର୍ଦ୍ଧାରିତ ସମୟରେ ଉପଯୁକ୍ତ କାର୍ଯ୍ୟ କରୁଛନ୍ତି କି ନାହିଁ ତାହା ପଚାରି ବୁଝିବେ, ଏଥିପାଇଁ ସ୍ୱତନ୍ତ୍ର ନିଜସ୍ୱ ମାର୍କିଂ ବ୍ୟବସ୍ଥା ରହିଛି ଯାହାକି ପିଲାଙ୍କ  ପାଇଁ ଉପଯୋଗୀ ହେବ. ଫୋନ ମାଧ୍ୟମରେ ଅଭିଭାବକ ଙ୍କୁ ବିଭିନ୍ନ ପ୍ରଶ୍ନ ପଚାରି ପିଲାଙ୍କ କାର୍ଯ୍ୟକଳାପ ବିଷୟରେ ଜାଣିବା ପରେ ତାଙ୍କ ପାଇଁ ଉପଯୋଗୀ ପଦକ୍ଷେପ ନେଇହେବ. ଏହା ଛଡା କେତେକ  ଅଭିଭାବକ ଙ୍କୁ ନେଇ ଏକ ହ୍ଵାଟ୍ସଆପ ଗ୍ରୁପ ମଧ୍ୟ ଖୋଲାଯାଇଛି ଯୋଉଥିରେ ଅଭିଭାବକ ମାନେ ସିଧାସଳଖ ଯୋଡ଼ି ହେବା ଫଳରେ ଦୂରତ୍ୱ କମିବା ସଂଗେ ସଂଗେ ପିଲାଙ୍କ ନିମନ୍ତେ ଏହା ବିଶେଷ ଉପଯୋଗୀ ହେବ ବୋଲି ଆଶା ରହିଛି

.

    ଆପଣମାନେ ଅନୁମାନ କରୁଥିବେ ଯେ ଆମ ସରକାରୀ ବିଦ୍ୟାଲୟରେ ପଢ଼ୁଥିବା ଛାତ୍ରଛାତ୍ରୀ ଏବଂ ଘରୋଇ ବିଦ୍ୟାଳୟରେ ପଢ଼ୁଥିବା ଛାତ୍ରଛାତ୍ରୀଙ୍କ ଶିକ୍ଷଣ ସ୍ତର କୁହନ୍ତୁ ବା ତାଙ୍କ ପରିବେଶ କୁହନ୍ତୁ ଅନେକ ଫରକ ରହୁଛି.ମୁଁ ଆଗରୁ ଗୋଟାଏ ପୋଷ୍ଟରେ ଏଇକଥା ଉଲ୍ଲେଖ କରିଥିଲି ,ପ୍ରାଥମିକ ବିଦ୍ୟାଳୟରେ କାର୍ଯ୍ୟ କରୁଥିବା ଶିକ୍ଷକ ମାନଙ୍କ ଅନେକ ସମସ୍ୟା ରହିଥାଏ ସେ ଦିଗକୁ ମୁଁ ଯିବାକୁ ଚାହୁଁନାହିଁ କେବଳ ଯୁକ୍ତାତ୍ମକ ଭାବ ପରିପୋଷଣ କରି ସମସ୍ୟାବହୁଳ ପରିସ୍ଥିତି ରୁ ଆଗକୁ ଯାଇ ଗୋଟିଏ ପ୍ରୟାସ କରିବା ଉଦ୍ଦେଶ୍ୟରେ ଏହି କାର୍ଯ୍ୟକ୍ରମ ହାତକୁ ନିଆଯାଇଛି.

    

     ଯେତେବେଳେ ପିଲାଟି ବିଦ୍ୟାଳୟକୁ ଅଧ୍ୟୟନ କରିବାକୁ ଆସେ ସେଠାରେ ଶିକ୍ଷକଶିକ୍ଷୟିତ୍ରୀଙ୍କ ଉପରେ ସମସ୍ତ ଦାୟିତ୍ୱ ନ୍ୟସ୍ତ ହୋଇଥାଏ କିନ୍ତୁ ଯେତେବେଳେ ବିଦ୍ୟାଳୟରୁ ପିଲା ଘରକୁ ଫେରେ ସେଠାରେ ସମସ୍ତ ଦାୟିତ୍ୱ ବାପାମାଆ/ଅଭିଭାବକ ଙ୍କ ହୋଇଥାଏ.ପ୍ରାୟ ଅଧିକାଂଶ ସରକାରୀ ସ୍କୁଲ ର ଛାତ୍ରଛାତ୍ରୀ ଏମିତି ପରିବେଶରୁ ଆସିଥାନ୍ତି ଯାହାଙ୍କ ମାର୍ଗଦର୍ଶନ କରିବା ନିମନ୍ତେ ଲୋକଙ୍କ ଅଭାବ ପରିଲକ୍ଷିତ ହୋଇଥାଏ, ଉଚିତ ମାର୍ଗଦର୍ଶନ ,ସଚେତନତା ର ଅଭାଵ, ପାରିପାର୍ଶ୍ବିକ ପରିବେଶ ପିଲାଙ୍କ ଉପରେ ବିଶେଷ ପ୍ରଭାବ ପକେଇଥାଏ ଯାହାଦ୍ୱାରା କଅଁଳ ଶିଶୁଟି ଭଗବାନ ଭରଷା ରେ ରହି ତାର ଜୀବନଯାତ୍ରା ଆଗକୁ ବଢ଼େଇଥାଏ.

  ଏ ସବୁ କହିବାର ତାତ୍ପର୍ଯ୍ୟ ହେଉଛି ମୋର ବ୍ୟକ୍ତିଗତ ଅନୁଭୂତି ରୁ ମୁଁ ଯାହା ଅନୁଭବ କଲି ଯେ ପିଲାମାନେ ଯେତେବେଳେ ବିଦ୍ୟାଳୟ ରୁ ଘରକୁ ଫେରୁଛନ୍ତି ତାଙ୍କର ଶୃଙ୍ଖଳା ରହୁନାହିଁ,କେତେବେଳେ କ'ଣ କରିବା ଦରକାର ,ପାଠ ପଢିବା ,ଖେଳିବା ,ଗାଧୋଇବା ସବୁ ନିର୍ଦ୍ଦିଷ୍ଟ ସମୟରେ ହେଉନାହିଁ ଯାହାଫଳରେ ପିଲାମାନଙ୍କ ଶିକ୍ଷଣ ଅଗ୍ରଗତି ହେବାରେ ବାଧା ସୃଷ୍ଟି ହେଉଛି. ଶିକ୍ଷକ, ଅଭିଭାବକ ତଥା ଛାତ୍ରଛାତ୍ରୀ ଙ୍କ ମଧ୍ୟରେ ଠିକ ତାଳମେଳ ରହୁଥିବାରୁ ଆଶାତୀତ ସଫଳତା ମିଳୁନାହିଁ. ପିଲାଙ୍କ ସମସ୍ୟା କୁ ଚିରାଚରିତ ଭାବେ ତାଙ୍କ ସମସ୍ୟା ନ ଭାବି ତାର ସମାଧାନ ନିମନ୍ତେ ଏକ ରାସ୍ତା ବାହାର କରିବାର ଏହି ଚେଷ୍ଟା.. ଗତ 16 ତାରିଖରେ ଅଭିଭାବକ ମାନଙ୍କ ବୈଠକରେ ଶିକ୍ଷକ ଶିକ୍ଷୟିତ୍ରୀ,ଅଭିଭାବକ ଏବଂ ଛାତ୍ରଛାତ୍ରୀ ଙ୍କ ମଧ୍ୟରେ ଆଲୋଚନା କରି ଏକ ନିଷ୍ପତ୍ତି ନିଆଗଲା.

ବିଦ୍ୟାଳୟ ଏବଂ ଗଣଶିକ୍ଷା ବିଭାଗ ମନ୍ତ୍ରୀ ସମୀର ରଞ୍ଜନ ଦାସଙ୍କ ସହ ସାକ୍ଷାତ

2019 ବର୍ଷର ଏକ ଅଭୁଲା ସ୍ମୃତି:-ଗତ ୨୦୧୯ ମସିହାରେ ସୌଭାଗ୍ୟ ବଶତଃ ମୋତେ ଓଡ଼ିଶାର ବର୍ତ୍ତମାନ ବିଦ୍ୟାଳୟ ଏବଂ ଗଣଶିକ୍ଷା ମନ୍ତ୍ରୀ ଶ୍ରୀଯୁକ୍ତ ସମୀର ରଞ୍ଜନ ଦାସଙ୍କ ସହ ଶିକ୍ଷା ଏବଂ ଶିକ୍ଷକଙ୍କ ସମସ୍ୟା ସମ୍ବନ୍ଧିତ କିଛି ଆଲୋଚନା କରିବାର ସୁଯୋଗ ମିଳିଥିଲା.ମନ୍ତ୍ରୀମଣ୍ଡଳରେ ଦାୟିତ୍ୱ ନେବା ପରଠାରୁ ପ୍ରାଥମିକ ଶିକ୍ଷା କ୍ଷେତ୍ରରେ ବହୁତ ସଂସ୍କାର ମୂଳକ ପଦକ୍ଷେପ ଗ୍ରହଣ କରିଥିବାରୁ ତାଙ୍କୁ ଧନ୍ୟବାଦ ଅର୍ପଣ କରିବା ସଙ୍ଗେ ସଙ୍ଗେ ଶିକ୍ଷକଙ୍କ ସମସ୍ୟା ଗୁଡିକ ବିଷୟରେ ଆଲୋଚନା କରିଥିଲି ଯାହାକୁ ଅତ୍ୟନ୍ତ ସୁନ୍ଦର ଭାବରେ ସେଗୁଡିକୁ ଯୁକ୍ତାତ୍ମକ ଢଙ୍ଗରେ ଗ୍ରହଣ କରିଥିଲେ ଯେଉଁଥିପାଇଁ ତାଙ୍କୁ ଧନ୍ୟବାଦ..

     ବର୍ତ୍ତମାନ ଆମ ରାଜ୍ୟରେ ସରକାରୀ ବିଦ୍ୟାଳୟ ଗୁଡିକର ଅବସ୍ଥା ଠିକ ନ ଥିବା ,ପାଠପଢ଼ା ସମସ୍ୟା, ଶିକ୍ଷକ ନିଯୁକ୍ତି ଅଭାବ ,ଜାଲ ଶିକ୍ଷକ ନିଯୁକ୍ତି ଆଦି ବିଷୟରେ ମନ୍ତ୍ରୀଙ୍କ ସଂଗେ ଆଲୋଚନା ହୋଇଥିଲା ,ସେ ଦିଗରେ ଦୃଢ଼ ପଦକ୍ଷେପ ଗ୍ରହଣ କରୁଛନ୍ତି ବୋଲି ମାନ୍ୟବର ମନ୍ତ୍ରୀ ଜଣେଇଥିଲେ.ଓଡ଼ିଶାର ଗ୍ରାମାଞ୍ଚଳରେ ପ୍ରାଥମିକ ସ୍ତରରେ ଶିକ୍ଷାଗ୍ରହଣ କରୁଥିବା ଅଧିକାଂଶ ଅଭିଭାବକ ସଚେତନ ନ ଥିବାରୁ ତାଙ୍କ ପାଇଁ ବିଭିନ୍ନ ସଚେତନତା କାର୍ଯ୍ୟକ୍ରମ ମାନେ ହାତକୁ ନେବାପାଇଁ ତାଙ୍କୁ ଅନୁରୋଧ କରିଥିଲି ଯାହାକୁ ମାନ୍ୟବର ମନ୍ତ୍ରୀ ସାଦରେ ଗ୍ରହଣ କରିଥିଲେ..

    

     ବାସ୍ତବିକ ଭାବେ ଦେଖିବାକୁ ଗଲେ ଶିକ୍ଷା ର ବିକାଶ ନିମନ୍ତେ ଅନେକ ସରକାରୀ ଯୋଜନା ହାତକୁ ନିଆଯାଇଛି କିନ୍ତୁ  ସଚେତନତା ଅଭାବରୁ ଅନେକ ଲୋକେ ଉପଯୁକ୍ତ ଶିକ୍ଷା ପାଇପାରୁନାହାନ୍ତି ଯାହା ଫଳରେ ସରକାରୀ ଯୋଜନା ଗୁଡିକର ସଫଳତାର ସହିତ ରୁପାୟନ ହୋଇପାରୁନାହିଁ. ଅନେକ ସମୟରେ କଥା ଉଠେ କାହିଁକି ସରକାରୀ ସ୍କୁଲରେ ଭଲ ରେଜଲ୍ଟ ଆସୁନାହିଁ ବୋଲି ତାହା ସତ୍ୟ ମଧ୍ୟ କାରଣ ଘରୋଇ ସ୍କୁଲ ମାନଙ୍କରେ ସରକାରୀ ସ୍କୁଲ ତୁଳନାରେ ଭଲ ରେଜଲ୍ଟ ଆସୁଛି.ଶିକ୍ଷା ପାଇଁ ଆବଶ୍ୟକ ତିନୋଟି ମୁଖ୍ୟ ଉପାଦାନ ହେଉଛନ୍ତି ଶିକ୍ଷକ,ଶିକ୍ଷାର୍ଥୀ ଏବଂ ଅଭିଭାବକ. ସମସ୍ତଙ୍କ ସମ୍ମିଳିତ ଉଦ୍ୟମ ଦ୍ୱାରା ଉତ୍ତମ ଶିକ୍ଷଣଶିକ୍ଷାଦାନ ପ୍ରକ୍ରିୟା ତ୍ୱରାନ୍ୱିତ ହୋଇପାରେ. ଏ ମଧ୍ୟରୁ କୌଣସି ଗୋଟିଏ ବି ଉପାଦାନ ତାର କର୍ତ୍ତବ୍ୟ ଠିକ ସେ ସମ୍ପାଦନା ନ କରନ୍ତି ତେବେ ତାହା ବାଧାପ୍ରାପ୍ତ ହେବା ସୁନିଶ୍ଚିତ.ଅନେକ ସ୍ଥାନରେ ଦେଖାଯାଏ ଜେ ଶତଚେଷ୍ଟା ପରେ ମଧ୍ୟ ପିଲାଏ ପାଠ ଭଲଭାବେ ଜଣନ୍ତିନି, ଦୋଷ କେବଳ ଶିକ୍ଷକ ଙ୍କ ଉପରେ ଆସିଥାଏ, ଆସିବା କଥା ମଧ୍ୟ କାହିଁକି ନା ଶିକ୍ଷକ ନିଯୁକ୍ତି ର ଏକମାତ୍ର ଲକ୍ଷ ହେଉଛି ଶିକ୍ଷା ର ବିକାଶ. ଶିକ୍ଷକ ମାନଙ୍କୁ ଯାବତୀୟ କାର୍ଯ୍ୟରେ ନିୟୋଜିତ କରିବା ମଧ୍ୟ ପିଲାଙ୍କ ପାଇଁ ଅହିତକର ଏହା ଦ୍ୱାରା ଶିକ୍ଷାଦାନ ବାଧାପ୍ରାପ୍ତ ହେଉଛି. ଏମିତି ଅନେକ ବାଧାବିଘ୍ନ ଥିବା ସତ୍ତ୍ୱେ ସମସ୍ତେ ସଂଘର୍ଷ ରତ .ତେଣୁକରି ସମସ୍ତେ ନିଜର କର୍ତବ୍ୟ ଠିକ ଭାବେ ପାଳନ କଲେ ଓଡ଼ିଶାର ପ୍ରାଥମିକ ଶିକ୍ଷା ନିଶ୍ଚିତ ଭାବେ ଆଗକୁ ଯିବ ବୋଲି ଆଶା.